L'orientaziun professiunala è in tema central sin il stgalim secundar I: En scola, parallelamain a la preparaziun da la midada ad ina scolaziun postobligatorica, elavuran ils giuvenils las premissas per tscherner lur finamira futura da furmaziun e da professiun.
Equivalenza da las vias da furmaziun
L'instrucziun en orientaziun professiunala accumpogna ils giuvenils sin lur via en direcziun d'ina soluziun da cuntinuaziun sin il stgalim secundar II. Intermediada vegn l'equivalenza da la furmaziun professiunala e da la furmaziun che ha lieu mo en scola e la permeabilitad da l'entir sistem da furmaziun.
Tut las scolaras ed ils scolars dal stgalim secundar I duain vegnir instruids en il sectur da l'orientaziun professiunala. La finamira è quella che tut ils giuvenils èn abels da prender ina decisiun sapientiva per lur soluziun da cuntinuaziun sin il stgalim secundar II. L'instrucziun en orientaziun professiunala resguarda la situaziun individuala da las scolaras e dals scolars ed adattescha correspundentamain la purschida.
Sin la via a questa decisiun dovran ils giuvenils sustegn. Quest sustegn è ina incumbensa cuminaivla dals geniturs, da las instituziuns da furmaziun, da la cussegliaziun professiunala e da studi sco era da l'economia, e la scola populara ha incumbensa da coordinaziun impurtanta.
La tscherna da furmaziun e da professiun è in process cumplex, en il qual vegn tschertgada la soluziun la pli realisabla tranter il profil individual dals interess e da las abilitads dals giuvenils ed il profil da las purschidas e da las exigenzas dal mund da furmaziun, da professiun e da lavur. La tscherna da l'emprima scolaziun sto vegnir vesida sco part d'ina planisaziun da carriera concepida a lunga vista, bain savend che alternativas e midadas èn pussaivlas e probablas.
L'instrucziun en orientaziun professiunala promova tar ils giuvenils l'occupaziun cun sasezs, cun il mund da lavur, cun normas e caracteristicas specificas per las schlattainas, la societad e la cultura sco era cun discriminaziuns entaifer la societad.
Malgrà la permeabilitad dal sistem da furmaziun è la tscherna d'ina soluziun da cuntinuaziun decisiva per la carriera professiunala. La decisiun vegn prendida en ina fasa da grondas midadas fisicas e psichicas. Quai tant en la percepziun dals giuvenils sco era en la percepziun da lur ambient social.
La decisiun individuala dals giuvenils ha lieu en il champ da tensiun tranter il singul uman, ses ambient social e la societad. In'orientaziun professiunala da success gida il giuvenil a tscherner la furmaziun e la professiun che correspunda il meglier pussaivel a ses giavischs ed a sias pussaivladads persunalas, ma era a las aspectativas ed als basegns da l'ambient social e da la societad.
